MNYAMA SIMBA SC ASEMA RATIBA YA MSIMU UJAO ACHA KABISA!,

Makamu wa Rais wa Simba sc, Geofrey Nyange 'Kaburu' 

Na Baraka Mpenja, Dar es salaam

WEKUNDU wa Msimbazi Simba wameipongeza bodi ya ligi kuu soka Tanzania na Shirikisho la soka Tanzania, TFF,  kutoa ratiba mapema kwa mujibu wa kanuni.

Makamu wa Rais wa Simba sc, Geofrey Nyange ‘Kaburu’ amesema kuwa kanuni inasema ratiba itoke angalau mwezi mmoja kabla ya msimu mpya wa ligi kuanza na wahusika wamefanya hivyo kwasababu ligi itaanza septemba 20 na ratiba imeanikwa hadharani jana Agosti 20.

“Niwapongeze waendeshaji wa ligi ambao ni bodi ya ligi na TFF kwasababu wamekidhi matakwa ya kikanuni ambapo inatakiwa ratiba kutoka angalau mwezi mmoja kabla ya ligi kuanza,” Alisema Kaburu. “Lakini sio hilo tu, ratiba imezingatia mambo mengi sana. Imezingatia watazamaji kwa kuwapa nafasi kuona mechi, kwasababu mechi za katikati ya wiki zinakosa watazamaji kwasababu ya mashabiki kutingwa na kazi”.

“Pia ratiba hii ni ya mwendelezo, tunaona ligi inaendelea mpaka desemba huko, hakuna mapumziko. Nadhani wameangalia wenzetu. Hakika ni ratiba nzuri kwasababu imeangalia watazamaji, wadhamini na hata wadhamini wa TV wataweza kusafirisha vifaa kwa amani”.

Simba itaanza kampeni ya kusaka ubingwa wa ligi kuu septemba 21 mwaka huu dhidi ya Coastal Union uwanja wa Taifa jijini Dar es salaam.

Baada ya mechi hiyo, septemba 27 wataikaribisha  Polisi Morogoro katika dimba hilo la Taifa.

Kwasasa kikosi cha Simba kipo Kisiwani Unguja, Zanzibar,  chini ya kocha mkuu, Mzambia Patrick Phiri kikiendelea kujiandaa na msimu mpya.

Kwa miaka mitatu sasa, Simba haijawa katika ubora wake huku ikikumbwa na mabadiliko ya mara kwa mara katika benchi la ufundi.

Lakini chini ya Phiri mwenye historia ya kuwapa ubingwa bila kufungwa mwaka 2009, Simba wanaamini wataingia kwenye ushindani tofauti na misimu mitatu ya nyuma.

Msimu uliopita, Simba walishika nafasi ya nne nyuma ya Mbeya City, Yanga na mabingwa Azam fc.