MABINGWA AZAM FC WAKWEA PIPA KWENDA KIGALI TAYARI KWA KOMBE LA KAGAME KESHO

Na Baraka Mpenja, Dar es salaam

Imechapishwa Agosti 7, 2014, saa 1:19 jioni

MSAFARA wa wachezaji 20 na viongozi wa  Azam fc umekwea pipa jioni ya leo kwenda mjini Kigali nchini Rwanda kushiriki michuano ya klabu bingwa Afrika mashariki na kati maarufu kwa jina la Kombe la Kagame.

Michuano hiyo mikubwa kwa ngazi ya klabu inaanza kutimua vumbi kesho (Agosti 8 mwaka huu) Mjini Kigali.

Azam fc wamechukua nafasi yaYanga sc waliogoma kuthibitisha kutuma kikosi A kama walivyotakiwa na CECAFA kufikia juzi jioni, lakini Yanga hawakufanya hilo.

Yanga walitaka kupeleke kikosi cha pili, lakini CECAFA walisema mashindno ya Kagame siyo ya watoto na hatua ya Yanga ililenga kuyashushia hadhi, hivyo wakawataka Yanga kupeleka kikosi cha kwanza na walipogoma waliwasiliana na TFF na kuwataka watume timu nyingine ambapo Azam fc walipata nafasi hiyo.

Azam fc wanaingia kundi A na kuungana na Wenyeji, Rayon Sport, Coffee kutoka Ethiopia, Atlabara ya Sudan kusini na KMKM ya Zanzibar.

Wana Lambalamba watacheza mechi ya kwanza kesho dhidi ya wenyeji Rayon Sports katika uwanja wa Taifa wa Amahoro jijini Kigali.

Azam wamekubali kwenda kushiriki kwasababu walihitaji nafasi hiyo na watatuma kikosi kilichotwaa ubingwa msimu uliopita cha wachezaji 20 pamoja na wachezaji wote wapya iliyowasajili.

Kikosi kilichotumwa Kigali na Azam FC ni: Makipa Mwadini Ally, Aishi Manula.

Mabeki: Shomary Kapombe, Gadiel Michael, Waziri Salum, Abdalallah Kheri, Aggrey Morris, David Mwantika na Said Mourad.

Viungo: Mudathir Yahya, Kipre Balou, Salumu Abubakar, Himid Mao, Khamis Mcha ‘Vialli’, Farid Musaa na Joseph Peterson.

Washumbuliaji: Didier Kavumbagu, Kipre Tchetche,  Leonel Saint-Preux na John Bocco.

Washambuliaji wawili, Ismail Diara kutoka Mali na Gaudens Mwaikimba wameachwa katika kikosi hicho.

Benchi la Ufundi litaongozwa na kocha mkuu Mcameroon, Joseph Marius Omog, kocha msaidizi Kalimangonga Ongala, kocha wa makipa Idd Abubakar na meneje, Jemadari Said.