WACHEZAJI WAKONGWE WAWEKEWA BONGE LA KIZINGITI STAND UNITED YA SHINYANGA

Stand United waliovalia jezi za rangi na machungwa

 Na Baraka Mpenja, Dar es salaam

Imechapishwa Mei 23, 2014, saa 10: 43 jioni

KUELEKEA msimu mpya wa ligi kuu soka Tanzania, timu mpya iliyopanda daraja, Stand United ya mkoani Shinyanga haitafanya mabadiliko ya aina yoyote  katika kikosi chake.

Kocha mkuu wa klabu hiyo, Fulgency Novatus ambaye ni muumini mkubwa wa soka la vijana  ameieleza MPENJA BLOG kuwa wachezaji aliokuwa nao ligi daraja la kwanza wataendelea kuwepo kundini isipokuwa wale tu watakaoshushwa kikosi cha vijana chini ya miaka 20.

“Falsafa ya vijana imesaidia sana kwasababu kijana unaweza kumwambia kitu akaelewa haraka tofauti na mchezaji mkongwe aliyeathirika huko alikokuwa awali”. Alisema Novatus.

“Katika usajili wangu nitazingatia vijana na nitaendelea kushikilia mfumo huu”

“Wachezaji wazoefu nao wana nafasi zao katika timu hizi zinazoingia kwa mara ya kwanza  michuano ya ligi kuu”.

“Lakini moja ya matatizo makubwa ya wachezaji wazoefu ni maslahi.

“Unajua timu za chini huwa zina mapato kidogo, inapotokea mchezaji mzoefu alipita kwenye neema ya maslahi , halafu akakumbana na ukata, anaweza kutengeneza kitu kibaya kwa wachezaji wanaokuja”.

Novatus alisema anawahitaji wachezaji wenye uzoefu watakaoenda sambamba na matakwa yake kwa maana ya kuitumikia timu kwa moyo wa dhati na kuamini kuwa watapata faida zaidi klabu itakapofanikiwa.

Aidha, aliongeza kuwa katika usajili wa wachezaji wenye uzoefu, atatumia kipimo vidogo sana ambacho ni kujiuliza kule walikotoka kulikuwa na nini na sababu ya kuondoka ni ipi.

“Timu za Dar es salaam zinahitaji wachezaji wazuri. Mchezaji anapokuja timu kama Stand United anafuata nini?, hakuonwa na timu za Dar?, tutakuwa makini kuangalia walikotoka kulikuwa na nini”. Alisema Novatus.

Kocha huyo alisema anahitaji kutengeneza timu ya ushindani na ana matumaini ya kufanya hivyo kwasababu mashabiki wao wanawapenda na wachezaji wake wamehiari kucheza mpira kwa kuisaidia klabu yao.