KAMATI ZA SAIDIA TIMU ISHINDE LIGI KUU ZIANGALIWE KWA JICHO LA TATU!

Na Baraka Mpenja

Shirikisho la soka Tanzania TFF limeshauriwa kuchunguza kwa makini kamati zinazoundwa kienyeji kusaidia baadhi ya timu za ligi kuu kushinda michezo yake ya nyumbani wakati huu wa dakika za lala salama.

Maafande wa Ruvu Shooting kupitia kwa afisa habari wake, Masau Bwire, wamesema kutokana na aina ya wajumbe wanaounda baadhi ya kamati hizo kuwa viongozi wenye dhamana ya kuongoza soka mikoani, kamati hizo haziaminiki tena.

Masau alisema suala la viongozi wa vyama kuwa wajumbe wa kamati hizo linaleta wasiwasi wa kupanga matokeo kwa kuwasaidia wenyeji.

“Ikumbukwe kuwa viongozi ndio wanaowapokea waamuzi na timu pinzani, sasa viongozi hawa wanapoongoza kamati hizo, hakika kunakuwepo na dalili za kufanya hujuma kwa wageni”. Alieleza Masau

Afisa habari huyo aliongeza kuwa hatua hii ya lala salama ambayo baadhi ya timu zinahangaika kushuka daraja, kuna baadhi ya waamuzi wanaboronga sana na kuleta wasiwasi.

Masau aliwata TFF kuangalia kwa jicho la tatu kamati hizi ili kama kuna mazingira ya rushwa wahusika wachukuliwe hatua kali za kisheria.

“Unajua kuna mazingira yanaweza kutengenezwa katika mchezo fulani halafu yakakulazimisha kuamini kwamba kuna madudu yanafanyika, hali ya kamati hizi ni hatari sana, endapo TFF wataona ni suala la kawaida, hakika litaleta madhara makubwa”. Alionya Masau.

Hivi karibuni mkoa wa Morogoro viongozi wa timu ya polisi Morogoro walikariri wakisema kumeanzishwa kamati na kampeni maalumu ya kuisaidi timu ya Polisi Moro isishuke daraja.

Pia jijini Mbeya kumetokea hali kama hiyo, viongozi wa chama cha soka wameunda kamati ya kuisaidia Prisons isishuke daraja msimu huu. Kamati hiyo ipo chini ya kamanda wa polisi wa mkoa huo, Diwani Athman Msuya akishirikiana na wadau wa soka.

Kufuatia hali hiyo kuendelea kutanda wingu la ligi kuu ligi kuu, Ruvu shooting walishauri suala hilo kuangaliwa kwa undani kwani kuna dalili ya kuhujumu timu pinzania mchezoni.