O’NEILL ATIMULIWA SUNDERLAND, TOKA OLD TRAFFORD FERGIE ASISITIZA CHICHA ANABAKI!!

MARA baada ya kuchapwa na Manchester United Bao 1-0 hapo jana, Klabu ya Sunderland imemtimua Meneja wao Martin O’Neill lakini huko Old Trafford, Meneja wa Man United, Sir Alex Ferguson, amesisitiza Javier Hernandez ‘Chicharito’ haendi popote baada ya kuibuka minong’ono kuwa atahama.

Sunderland

Klabu ya Sunderland imemtimua Meneja wao, Martin O’Neiil, kufuatia kutoshinda katika Mechi zao 8 za Ligi zilizopita na kambua Pointi 3 tu kati ya hizo na sasa wako Pointi moja tu juu ya zile Timu 3 za mkiani huku Mechi zikiwa zimebaki 7.

++++++++++++++++++++++++++++++++

MSIMAMO-Timu za chini:

15 Newcastle  Mechi 31 Pointi 33

16 Sunderland  Mechi 31 Pointi 31

17 Wigan  Mechi 30 Tofauti ya Magoli -20 Pointi 30

====================================

18 Aston Villa  Mechi 30 Tofauti ya Magoli -25 Pointi 30

19 QPR  Mechi 30 Tofauti ya Magoli -22 Pointi 23

20 Reading  Mechi 31 Tofauti ya Magoli -25 Pointi 23

++++++++++++++++++++++++++++++++

Hata hivyo, kutimuliwa kwake kumepokewa na mstuko na Wadau wengi wa Sunderland ambao wamedai huu si wakati muafaka wa kufanya hivyo.

Mmoja wa hao ni Staa wa zamani wa Sunderland, Kelvin Kibane, ambae ametamka: “Nimeshangazwa sana. Ni uamuzi mbovu katika wakati mbaya! Sidhani kama kuna Meneja anaeweza kuja kubadili hapa kabla mwisho wa Msimu!”

FERGIE NA CHICHARITO!

Bosi wa Manchester United Sir Alex Ferguson amesisitiza Javier Hernandez ‘Chicharito’ hataondoka Old Trafford mwishoni mwa Msimu.

Hadi sasa, Chicharito amecheza Mechi 15 za Ligi na kufunga Bao 8 lakini amekuwa hapati nama mara kwa mara na Ferguson amekuwa akipendelea kuwapanga Wayne Rooney, Robin van Persie na Danny Welbeck.

Jambo hilo limezua uvumi kuwa Straika huyo kutoka Mexico huenda akahamia Juventus au Real Madrid mwishoni mwa Msimu ingawa pia yapo maneno kuwa anaweza kwenda Atletico Madrid ikiwa Straika wao Radamel Falcao atahama Atletico.

Hata hivyo Ferguson amesema: “Chicharito ana Mkataba wa muda mrefu. Hatutazungumza na yeyote kuhusu yeye. Nazungumza na kila Mchezaji hasa wale hawachezi kila Siku na nimemwambia ni ngumu kumweka yeye benchi kwa vile ana Goli 16.”

Ferguson aliongeza: “Yeye kupata namba ni ngumu ukiwa na Wachezaji kama Robin van Persie, Welbeck, Rooney na Kagawa. Lakini hii ni bora kwetu ukiwa na Kikosi imara, inatupa manufaa sana.”