COUTINHO KUWAFANYA NINI THIKA UNITED LEO? JAJA ATAFUFUKA?

Na Baraka Mpenja, Dar es salaam

MBRAZIL Marcio Maximo leo majira ya saa 11:00 jioni anatarajia kuiongoza Yanga katika mechi ya kimataifa ya kirafiki dhidi ya Thika United ya Kenya ndani ya dimba la Taifa jijini Dar es salaam.

Mechi hii ni muendelezo wa mechi za kujipima ubavu kabla ya kuanza kwa ligi kuu soka Tanzania bara inayotarajia kuanza kushika kasi septembe 20 mwaka huu ambapo Yanga wataanza kampeni zao za kusaka ubingwa dhidi ya Mtibwa Sugar katika dimba la Jamhuri mkoani Morogoro.

Mchezo na Thika United ni kipimo kizuri kwa Maximo ambaye alifanya vizuri katika mechi za kirafiki alizocheza Zanzibar ambapo wachezaji wote walionesha viwango vya hali ya juu.

Viingilio katika mechi ya leo ni shilingi elfu 30,000 kwa VIP A na shilingi 20,000 kwa VIA B.

Viti vya rangi ya chungwa ni shilingi 10,000, wakati viti vya rangi ya kijani na bluu kiingilio ni buku tano tu (5,000/=).

Hata hivyo, kiungo mshambuliaji wa Yanga, Mbrazil, Andrey Coutinho anatarajia kuwa kivutio katika  mchezo wa leo kutokana na kiwango kikubwa alichoonesha katika mechi za kirafiki visiwani Zanzibar.

Coutinho alifunga mabao 2 katika mechi 3 alizocheza Zanzibar. Alifunga bao moja moja katika mechi mbili dhidi ya Shangani na KMKM, Yanga ikishinda mabao 2-0 kwa mechi zote.

Mbali na kufunga mabao hayo alionekana kuwa na kasi nzuri uwanjani, alimiliki vizuri mipira na kupiga pasi kwa ufundi mkubwa.

Pia alionekana kuwa na uwezo mzuri wa kupiga kona na mashuti ya mbali.

Kwa mashabiki wa Yanga waliopo jijini Dar es salaam watapata fursa nzuri ya kumuona Coutinho akifanya vitu vyake katika dimba la Taifa.

Kwa Mbrazil mwingine, Geilson Santos Santana ‘Jaja’ hakuonesha kiwango kikubwa katika mechi za Zanzibar licha ya kufunga bao pakee katika ushindi wa 1-0 iliopata Yanga dhidi ya Chipukizi FC uwanja wa Gombani Pemba.

Jaja anatakiwa kuonesha kiwango leo hii ili kuwapa imani mashabiki wa Yanga.

Mbali na Wabrazil hao wawili, wachezaji wengine watakuwa na kibarua cha kuonesha makali yao mbele ya Marcio Maximo mwenye rekodi ya kushinda mechi zote tatu za kirafiki alizocheza mpaka sasa.