MASHINDANO YA UMISSETA 2018 YAZIDI KUCHANJA MBUGA

Mashindano ya Umoja wa shule za Sekondari nchini Tanzania (UMISSETA) 2018 yameendelea kutimua vumbi leo hii kwa michezo mbalimbali kuweza kupigwa ambapo katika mtanange wa mpira wa miguu hatua ya robo fainali wavulana, Timu ya mkoa wa Mwanza imeendeleza ubabe wa kutopoteza mchezo ata mmoja baada ya kuifunga timu ya mkoa wa Pemba kutoka Tanzania Visiwani kwa jumla ya mabao 3-1 katika hatua ya robo fainali,mtanange uliopigwa katika uwanja wa Nsumba Sekondari jijini Mwanza.

Katika hatua nyingine Timu ya mkoa wa Tanga imefanikiwa kufuzu kuingia katika hatua ya Nusu Fainali baada ya kuiondosha Timu ya mkoa wa Mara kwa jumla ya mabao 2-0, mchezo uliochezwa katika uwanja wa chuo cha ualimu Butimba ambapo kwa matokeo hayo sasa timu hiyo itakutana na timu ya mkoa wa Dar es Salaam ambayo ilifanikiwa kuitupa nje timu ya Mkoa wa Iringa kwa magoli 2-0 katika hatua ya robo fainali.

Hatua ya nusu fainali itaendelea tena kesho kwa michezo hiyo kupigwa mida ya jioni katika uwanja wa chuo cha ualimu Butimba ambapo Tanga watacheza na Dar es Salaam kuanzia saa 9 alasiri na Mwanza watachuana na Geita kuanzia mida ya 10 jioni.

Kwa upande wa Michezo ya wasichana Mpira wa miguu timu ya mkoa wa Mbeya ambayo ndio ilidhaniwa kuwa timu tishio katika mashindano hayo ilijikuta ikutupwa nje kwa mikwaju ya penati 3-1 na timu ya mkoa wa Tabora, wakati Dar es salaam wakiichachafya timu ya mkoa wa Kagera kwa magoli 3-0.

Aidha katika mchezo wa netiboli hatua ya robo fainali timu za mkoa wa Dar es salaam, Tanga, Mwanza na Morogoro zimetinga katika hatua ya nusu fainali baada ya DSM kuifunga Tabora kwa magoli 55 kwa 27, Tanga kuifunga Mara kwa magoli 40 kwa 33, Mwanza kuifunga Geita kwa magoli 54 kwa 46 na Morogoro kuifunga Singida kwa magoli 64 kwa 19.

Na katika mchezo wa mpira wa mikono (Handball) kwa upande wa wasichana timu ya mkoa wa Songwe itaumana na Timu ya mkoa wa Mbeya wakati Morogoro ikimenyana na timu ya mkoa wa Mara, huku wavulana wao Dar es salaam itakuwa na kibarua dhidi ya mkoa wa Tanga wakati Mwanza ikicheza na Unguja.