STERLING: NATAKA MAKOMBE SIO PESA

Baada ya kuwepo na tetesi juu ya winga machachari wa klabu ya Liverpool Raheem Sterling kukataa ofa ya kusaini mkataba mpya hatimaye mchezaji huyo amethibitisha taarifa hizo.

Katika mahojiano yake jana na kituo cha Televisheni cha BBC  Sterling amesema kuwa ni kweli alikataa dili la kusaini mkataba mpya katika klabu yake kwani yeye haihitaji pesa bali ni makombe.

Majogoo hao walimuandalia winga huyo mwenye umri wa miaka 20 mkataba ambao ungemfanya apokee mshahara wa Paundi 100,000 kwa wiki lakini mchezaji huyo alikataa kusaini na hivyo kuleta mashaka kwa mabosi wa klabu hiyo

Katika mahojiano hayo mwingereza huyo alisisitiza kuwa hapendelei pesa katika maisha yake ya soka ila kitu cha kwanza ni makombe na kwa sasa hayupo tayari kuanzisha mazungumzo ya mkataba mpya na klabu yake mpaka mwishoni mwa msimu huu. "Sichezi kwa ajili ya kupata hela,ninachotaka ni vikombe.

Sichezi mpira ili niendeshe magari mazuri,niwe na nyumba nzuri. Ninachotaka ni kucheza na kushinda vikombe " alisema Sterling

Kwa upande mwingine Sterling amekanusha taarifa zilizozagaa kuwa anataka kutimkia klabu ya Arsenal na kusisitiza kuwa taarifa hizo si za kweli.

Winga huyo aliyejiunga na majogoo hao mwaka 2010 akitokea klabu ya Qpr kwa sasa anapokea mshahara wa paundi 35,000 kwa wiki na amebakiza mkataba wa miaka miwili katika klabu hiyo