MTEMI RAMADHANI ATEMA NYONGO BAADA YA SERENGETI BOYS KUVURUNDA DHIDI YA AMAJIMBOS

Mdau wa soka, Mtemi Ramadhani amelaumu maandalizi ya zima moto kwa timu za taifa za vijana

Na Baraka Mpenja, Dar es salaam

Imechapishwa Agosti 3, 2014, saa 6:02 mchana

KUKOSEKANA kwa wafadhili na wadhamini katika soka la vijana, maandalizi duni ni miongoni kwa sababu za timu za taifa kuboronga katika michuano ya kimataifa.

Mchezaji wa zamani na mdau wa soka nchini, Mtemi Ramadhani jana alikuwa shuhuda wa mechi baina ya timu ya vijana ya Tanzania chini ya miaka 17, Serengeti Boys na Afrika kusini ambapo wenyeji waliibuka na ushindi  mnono wa mabao  4-0.

Mtemi baada ya mechi hiyo alisema: “Mchezo haukuwa mbaya sana wala mzuri sana. Hali ya uchezaji: wachezaji walianza vizuri, lakini sasa hapa pana baridi kali, baadaye vijana walikuja wamechoka sana, kwahiyo wenzetu wakacheza sana na kutufunga mabao 4-0 na tunamshukuru mungu wametunga hayo, kwakweli wangetufunga hata mabao 7 au 8”.

Kutokana na matokeo hayo mabaya, mtandao huu ukataka kujua wapi kuna makosa katika soka la vijana. Mtemi akafunguka:

“Kwanza timu zetu hizi tuzilee kwa muda mrefu,na kama unavyoelewa timu yetu hii ya vijana haina wafadhili wala wadhamini, nafikiri kama tungepata watu hawa, timu ingefanya mazoezi ya muda mrefu, vijana wakawa pamoja kwa muda mrefu, nafikiri jambo hili lingetusaidia nchi kutoka hapa tulipo”.

‘Lakini hii kusema  labda tunacheza baada ya maandalizi ya wiki moja au mbili, haitusaidii. Vijana wanakosa uzoefu. Hata ukiangalia vijana wetu hawa , hii ni mechi ya pili tu, kiukweli wanatakiwa wapate uzoefu, wapate wafadhili, wacheze mechi nyingi za kimataifa za kirafiki. Afrika kusini wapo mbali, wapo juu kimchezo, unaweza kuona tofauti yao na sisi”

Tayari tatizo lipo, Mtemi akiwa mdau wa soka nchini alitoa wito: “Ombi langu,  wadhamini wajitokeze kudhamini timu za vijana, sio timu kubwa tu. Vijana wapate uzoefu, wakae kambini muda mrefu na wacheze mechi mbalimbali za kirafiki za kimataifa”

Serengeti Boys inawasubiri kaka zao wa Taifa Stars ili warudi pamoja nchini.

Stars inashuka dimbani jioni ya leo kukipiga na timu ya taifa ya Msumbuji ‘Black Mambas’ katika mchezo wa marudiano, kuwania kupangwa hatua ya makundi ya kusaka tiketi ya kushiriki fainali za mataifa ya Afrika, mwakani nchini Morocco.

Mechi ya kwanza jijini Dar es salaam, Taifa Stars ilitoka sare ya mabao 2-2 na ili kusonga mbele inahitaji ushindi wa aina yoyote au sare ya kuanzia mabao 3-3.