Dolased yaanzisha mradi wa kulinda haki za walemavu

 

Na Eleuteri Mangi-Maelezo

TAASISI ya walemavu inayojishughulisha na masuala ya kisheria katika maendeleo ya kijamii na kiuchumi ya watu wenye ulemavu (Dolased) imeanzisha mradi wa kuinua ufahamu, kukuza na kulinda haki za kisheria za watu wenye ulemavu na wasio na ulemavu ili akuhakikisha upatikanaji wa haki zao.

Kauli hiyo imetolewa na Mkurugenzi Mtendaji wa Taasisi ya Dolased Gidion Mandesi alipokuwa akiongea na waandishi wa habari leo jijini Dar es Salaam.

Mradi huu wa Dolased unaongozwa na malengo yaliyoainishwa kwa nia ya kufanikisha utoaji huduma kwa wahitaji hususani masuala ya kisheria.

“Taasisi yangu itaenelea kutoa ushawishi na mbinu za kisheria katika utekelezaji wa haki za watu wenye ulemavu na kuijengea uelewa jamii juu ya yaliyomo kwenye sheria namba tisa ya watu wenye ulemavu ya mwaka 2010 pamoja na kanuni zake za mwaka 2012” alisema Mandesi.

Vivyo hivyo Mandesi alisema kuwa malengo mahususi ya kufanikisha mradi wa tasisi hiyo ni pamoja na kuongeza upatikanaji wa haki kwa watu wenye ulemavu na wasio na ulemavu nchini, kutoa mafunzo yz kisheria, kuratibu na kuwachangamanish wasidizi wa kisheria wenye ulemavu katika wilaya zenye vituo vya wasaidizi wa kisheria.

“Malengo haya ni muhimu katika taasisi, dira yetu ni kuwa na jamii yenye kiwango cha juu cha maendeleo endelevu kijamii ambapo haki za watu wenye ulemavu zinazigatiwa na zinaheshimiwa” alisema Mandesi.

Mandesi aliendelea kusema “Dhamira yetu ni kujikita na kujitolea katika kuimarisha maisha ya watu wenye ulemavu, watoto, vijana na wazee kwa kuzingatia mtazamo wa kijinsia nchini kwa kutumia mikakati tuliojiwekea”.

Mikakati inayosimamiwa na Dolased ni pamoja na kuimarisha mabadiliko ya kisheria na kisheria, kuwajengea uelewa watu wenye ulemavu juu ya masuala kisheria na haki za binadamu na kuwawezesha kiuchumi.

Mingine ni kufanya tafiti, uchapishaji wa taarifa na usambazaji wa habari juu ya hali za watu  wenye ulemavu nchini na kuwashirikisha katika ma[pambano dhidi ya ukimwi na virusi vya ukimwi pamoja na majanga mengine.

Aidha, Mandesi alisema kuwa zipo aina saba za ulemavu za ulemavu ambazo ni wasioona, walemavu wa viungo, viziwi, albino, walmavu wa akili, wenye uono hafifu na walemavu mchanganyiko.

Naye kwa upande wake Afisa Mipango wa Taasisi ya Dolased Risala Msemo alisema kuwa mradi huo utatekelezwa kwa kuwapa mafunzo kwa kuwajengea uwezo watu wenye ulemavu 110 ili wawe na sifa za kuwa wasaidizi wa msaada wa kisheria.

“Mafunzo haya tutatoa katika kanda tatu ambazo ni kanda ya mashariki, kati na kanda ya ziwa, mafunzo yatakuwa ya siku 25 ambayo yatagawanywa na kutolewa kwa siku tano mfululizo yatakuwa ya awamu tano” ailsema Risala.

Risala alisema kuwa taasisi hiyo imeandaa mwongozo sifa wawakilishi watakaopata mafunzo na namna ya kuwapata walemavu watakaonufaika na mafunzo hayo kutoka wilaya zote nchini.

Sifa hizo ni pamoja na awe na elimu ya kanzia kidato cha nne na kuendelea na kufaulu, awe mtu mwenye ulemavu, awe anatoka kwenye wilaya husika, awe anamajina kamili matatu kwa ajili ya kumbukumbu na awe na umri wa miaka 18 na kuendelea.

Mradi huu unatekelezwa na Dolased katika mikoa ya Dar es Salaam ambayo ni makao makuu ya taasisi, Dodoma na Mwanza.

Tasisi ya Dolased ilianzishwa Agosti 14, 1998 na mradi umeanzishwa na kutekelezwa rasmi Agosti 1, 2013 na kufadhiliwa na Utoaji wa Msaada wa kisheria (LSF) kwa muda wa miaka miwili na utakamilisha shughulu nzake julai 31, 2015.