LICHA YA KOBOLEWA KATIKA USAJILI, MTIBWA SUGAR YAJIIMARISHA VIKALI

Kocha mkuu wa Mtibwa Sugar, Mecky Mexime (wa kwanza kulia) akiwa kazini

Na Baraka Mpenja, Dar es salaam

MTIBWA Sugar wamepania kufanya vizuri na kurejesha makali yao ya nyuma katika michuano ya ligi kuu soka Tanzania bara inayotarajia kuanza septemba 20 mwaka huu.

Wakata miwa hao wa Manungu, Turiani, mkoani Morogoro, wataanza kampeni za kusaka ubingwa dhidi ya Yanga, septemba 20 mwaka huu katika uwanja wa nyumbani wa Jamhuri mkoani Morogoro.

Kocha mkuu wa mabingwa hao wa Tanzania kwa mwaka 1999 na 2000, Mecky Mexime ameiambia MPENJA BLOG kuwa licha ya kubomolewa kwa kikosi chake, maandalizi yanakwenda vizuri na vijana wapya waliopatikana katika usajili wa majira ya kiangazi wanazidi kuimarika .

Mexime amekiri kuwa kila mwaka anakuwa na kazi ngumu ya kuijenga timu upya kwasababu wachezaji wengi wa kikosi cha kwanza huwa wananunuliwa na timu nyingine zikiwemo Simb na Yanga,hivyo anashindwa kuonesha kiwango cha juu.

Katika kikosi cha Simba wachezaji wakubwa kama Shaaban Kisiga, Awadh Juma na Hussein Sharrif wametokea Mtibwa siku za karibuni, ingawa Awadh alisajili msimu uliopita.

Hussein Javu wa Yanga naye alisajiliwa kutoka Mtibwa Sugar msimu uliopita.

“Kwanza tunamshukuru Mungu kwasababu tunaendelea vizuri. Tatizo ni kwamba kila mwaka ninajenga timu upya. Lakini kinachotusaidia ni kwamba Tanzania tuna vipaji vingi na tumechukua vipaji vipya na timu inaendelea vizuri.” Alisema Mexime.

“Kwa muda mrefu Mtibwa haijafanya vizuri na tatizo ni ndio hilo kwamba kila mwaka tunajenga timu, lakini tunajiandaa vizuri licha ya kuwepo matatizo mbalimbali”.

“Kikubwa unapoijenga timu upya unaangalia kwanza nyuma, jinsi ya kujilinda na hatimaye jinsi ya kushambulia. Kwasasa timu inalinda na kushambulia vizuri kwa kutengeneza nafasi, lakini tatizo linabaki kufunga”.

“Ni tatizo tunalopambana nalo na naamini kabla ya ligi kuanza tutakuwa sawasawa. Niwaambie mashabiki wa mpira wa Mtibwa Sugar na wa Tanzania kwa ujumla watuombee kila la heri”.